د افغانستان لنډ تاریخ

د افغانستان د تاریخ، هویت او تمدني شالید په اړه یو له تر ټولو مهمو او باوري اثارو څخه دی. دا کتاب د ستر افغان مورخ او محقق عبدالحی حبیبي له خوا لیکل شوی، او د افغانستان تاریخي بهیر په لنډه، خو ډېر ژور او مستند ډول بیانوي.

په دې کتاب کې د افغانستان د لرغوني تمدن، تاریخي نومونو، زړو سلطنتونو او د افغان ملت د جوړښت او وده په اړه مهم معلومات وړاندې شوي دي. لیکوال د آریانا له پېر څخه تر اسلامي دورې، د غزنویانو، غوریانو، تیموریانو، لوديانو، سوریانو او د ابدالي/دراني دولت تر جوړېدو پورې د افغانستان د سیاسي او کلتوري پېښو لنډ خو جامع تاریخ بیان کړی دی.

دا اثر یوازې د جګړو او سلطنتونو کتاب نه دی، بلکې د افغان ولس د هویت، ژبې، فرهنګ، دودونو، ملي شخصیتونو او تاریخي ارزښتونو یوه علمي هنداره ده. د حبیبي لیکنه په دې کتاب کې د تحقیق، اسنادو او تاریخي سرچینو پر بنسټ ولاړه ده، له همدې امله دا کتاب د زده کوونکو، څېړونکو او د افغانستان د تاریخ مینه والو لپاره یو مهم مرجع ګڼل کېږي